رد الفنان عمرو سعد على الجدل المثار خلال الفترة القليلة الماضية، حول مسلسله الجديد سيد الناس، والذي سيعرض في السباق الرمضاني القادم 2025، والمكون من 30 حلقة.

عمرو سعد يرد على مقارنته بمحمد رمضان

وقال عمرو سعد خلال تسجيل صوتي ببرنامج «ET بالعربي»: «الكلام الكتير على السوشيال ميديا، أنا يمكن لأول مرة بتكلم، ولما بتكلم متعود على الوضوح التام والصراحة، لأن ناس كتير تعرف عني إني رجل قليل الكلام وبخجل أطلع تكلم، ولا أحب أشير إلى نجاح نجحته أو مشاهدة حققتها، وده حرصا على مجهود كل الناس اللي اشتغلت».

وأضاف: «زملائي اللي بيعملوا أعمال رائعة أنا شخصيا بتفرج عليها وأتابعها وبكلمهم أهنئهم وأنا من جمهورهم، مينفعش تشاور على نجاحك، احنا بنحلم نعمل حاجه تأثر في الجمهور وتسعدهم، والعمل يخلص بنفكر في العمل اللى بعده، لكن للأسف الشديد الصمت ده بيتفهم غلط بعد توحش السوشيال ميديا، ووجود حملات مدفوعة الأجر لصناعة انطباعات معينة وكاذبة ومزيفة شيء غريب جدا، وللأسف الشديد إن الجمهور بتاعنا، هو جمهور طيب».

ووجه القائمون على البرنامج سؤالا إلى عمرو سعد، حول تشبيه الجمهور مسلسله الجديد بأعمال محمد رمضان، حيث قال: «وفي النهاية ممكن يحصل تشويش لانطبعاته عن الأشخاص والأعمال، بقت حاجة غريبة ومريبة بعد تفشى ظاهرة السوشيال ميديا، وأن الناس تستمتع بكدا وتتابع أخبار النجوم وأرقام التريندات وغيرها، يمكن كان أكبر سؤال بيواجهنا واحنا بنستعد لتقديم مسلسل السنة دي هو نوع الدراما اللب هنقدمها، ايه اللى هنقدمه السنادي مختلف عن مستوى الشكل والمضمون، واللي هيقدمه المخرج محمد سامي، وهو كاتب أعماله، ويفكر أن يقدم شئ مختلف عن السنوات الماضية، وهذا تحدي مش بسيط، وبالفعل مع النقاشات الكتير، هو المخرج قرر يختار دراما هو نفسه بيقول إنه أول مرة يقدمها، جديدة عليه وعلي وجميع الأبطال المشاركين، والناس هتتفاجأ بالمسلسل عندما يشاهدوه، ويا رب يعجب الجمهور ويحبوه على قد المجهود اللي بذلناه خلف الكاميرا».

عمرو سعد يوجه رسالة لمارك زوكربيرج

واختتم عمرو سعد حديثه قائلا: «عايز أوجه رسالة للأستاذ مارك زوكربيرج، واقوله الله يسامحك ياسطا، ارتاحت كدة يا عم، اديك عومت العالم في نهر من الأكاذيب، وآخ حاجة عايز أقولها بجد أنا بعبر عن فرحتى وفخري إن السنادي هقف قدام عدد ضخم من النجوم الكبار اللي ليهم تاريخ، بشكرهم وفرحان إني جزء منهم، وسعيد إننا هنقدم للجمهور عمل يسعدهم ويقدملهم شيء مفيد».